Kigali; kuwa 13 Mutarama 2025,  Minisitiri  Uwimana Consolee, yatangije icyumweru cyahariwe ubuzima bw'umwana n'umubyeyi ku nsanganyamatsiko: Hehe n'Igwingira: Twite ku buzima bw'umubyeyi utwite, umwana, umwangavu, imirire n'isuku, dukingiza abana inkingo zose.

Ni icyumweru cyatangiye kuri uyu wa 13 Mutarama kikazasoza kuwa 17 Mutarama 2025. Hateganyijwe ibikorwa bitandukanye birimo guha abana ikinini cy'inzoka no guha inkingo abana bacikanwe n'ibindi bikorwa bigamije guteza imbere ubuzima bw'umwana n'umubyeyi.

Minisitiri Uwimana Consolee yavuze ko mu Rwanda hatewe intambwe ishimishije ku buzima bw’umubyeyi n’umwana bigaragazwa n’imibare y’igabanuka ry’impfu z’ababyeyi n’abana, abana bafite imirire mibi asaba gukomeza ubutafanye mu kurandura Igwingira n’ikibazo cy’inda ziterwa abangavu nka bimwe mu bibazo bikibangamiye umwana n'umubyeyi

Atanga ubutumwa, Minisitiri  Uwimana Consolee yasabye abagore batwite kwitabira serivisi zo kwa muganga, bisuzumisha inshuro 8 nkuko biteganywa, kubyarira kwa muganga, kwihutira kujya kwa muganga cyangwa ku mujyanama w’Ubuzima igihe agize ikibazo, yibutsa Ababyeyi gukingiza abana inkingo zose.

Minisitiri  Uwimana Consolee yasabye kurushaho kwita ku mirire y’abana n’ababyeyi batwite tubashakira indyo yuzuye, tubarinda imirire mibi. Ibi byose dusabwa kubikomatanya no kugira isuku mugutegura ibyo turya, gusukura amazi yo kunywa, kugira isuku ku mubiri wacu no mungo zacu.